Kryetari i Kuvendit të Kosovës, Dimal Basha, ka pritur sot në takim ambasadorin e ri të Sllovenisë në Kosovë, Borut Blaj, si dhe zëvendësambasadoren Milena Radenkovic.
Në fillim të takimit, Basha e uroi ambasadorin Blaj për emërimin e tij dhe i uroi mirëseardhje në Kosovë, duke theksuar rëndësinë e marrëdhënieve bilaterale dhe bashkëpunimit mes dy shteteve. Ai falënderoi popullin dhe qeverinë sllovene për mbështetjen e vazhdueshme që i kanë dhënë Kosovës ndër vite.
“Rëndësia e partneritetit tonë me Slloveninë është e madhe. Mbështetja juaj për Kosovën ka qenë gjithmonë e pranishme dhe e çmuar,” tha ndër të tjera kryetari i Kuvendit.
Basha e njoftoi ambasadorin për procesin e konstituimit të Kuvendit dhe theksoi nevojën e funksionalizimit të institucioneve të tjera. Ai kërkoi mbështetje nga Sllovenia për anëtarësimin e Kosovës në Këshillin e Evropës dhe për marrjen e statusit të kandidatit për Bashkimin Evropian, duke theksuar gjithashtu domosdoshmërinë e largimit të masave që pengojnë zhvillimin dhe avancimin ndërkombëtar të vendit.
Gjatë diskutimit, Basha theksoi rëndësinë e bashkëpunimit parlamentar ndërmjet Kosovës dhe Sllovenisë, me fokus të veçantë në integrimin evropian dhe zhvillimin ekonomik.
Nga ana e tij, ambasadori Blaj rikonfirmoi mbështetjen e Sllovenisë për Kosovën, duke theksuar përkushtimin e vendit të tij për procesin e integrimit evropian të Kosovës dhe për rritjen e bashkëpunimit rajonal.
