Kryetari i Këshillit të Prindërve të Kosovës, Besnik Dragusha i ka bërë thirrje Ministrisë së Arsimit që të bëjë blerjen e teksteve shkollore dhe shpërndarjen e tyre falas, e jo ndërrim të metodologjisë pak para fillimit të vitit të ri shkollor.
Dragusha në emisionin “Ditari”, në Tëvë1, tha se ky ndërrim i metodologjisë mund të shkaktojë probleme në sigurimin e librave për nxënësit.
“Ne si Këshill i Prindërve shpresojmë dhe besojmë, dhe i bëjmë thirrje Ministrisë që të bëjë blerjen e librave dhe shpërndarjen e tyre falas dhe jo të ndërroj metodologjinë tani pak para se të filloj viti i ri shkollor, për arsye se kjo ide mund të shkaktojë probleme në sigurimin e librave për fëmijët. Për këtë arsye unë po bëj thirrje dhe ne si Këshill që, po që se ka mundësi Ministria e Arsimit të bëjë sigurimin e librave dhe shpërndarjen e tyre përmes DKA-së, nëpër shkolla ashtu siç ka qenë praktikë qe disa vite në Kosovë”, tha ai.
Dragusha theksoi se tashmë janë caktuar dy takime ai i Këshillit të Prindërve të Komunës së Prishtinës dhe ai në nivel nacional të kryesisë për të vendosur me hapat që do të merren tutje.
”Ne kemi caktuar që t’i kemi dy takime njëri do të jetë nesër i Këshillit të Prindërve të Komunës së Prishtinës dhe pasnesër e kemi takimin në nivel nacional të kryesisë, dhe aty do të vendosim cili do të jetë qëndrimi jonë final lidhur me këtë çështje dhe do ta bëjmë publik qëndrimin tonë. Mirëpo ne bëjmë thirrje që Ministria mos të shqyrtojë mundësinë e rimbursimit por të bëjë realizimin e blerjes së librave dhe sjelljen e tyre nëpër shkolla, sepse kjo është lehtësim shumë i madh si për nxënësit si për fëmijët”, shtoi Dragusha./teve1.info./
