Më 21 prill në katër komunat veriore do të votohet për largimin e kryetarëve që sipas Udhëzimit Administrativ, kërkohet 51.1% të trupës elektorale. Kryetari i Leposaviqit, Lulzim Hetemi ka thënë për Tëvë1 se pajtohet të largohet sipas Udhëzimit Administrativ, por që sipas tij, çdo kryetar tjetër duhet të punon sipas ligjeve të Republikës. E kryetari i Zubin Potokut, Izmir Zeqiri nuk beson se në komunën e tij do të ketë përqindje për largimin nga posti i tij.
21 prillin, ditën kur do të votohet për largimin e tij nga karrigia e të parit të Leposaviqit po e pret më kënaqësi.
Madje Lulzim Hetemi thotë që kanë bërë gati edhe zyrën brenda komunës ku do realizohet ky proces i votimit.
“ Para 1 jave dite e kemi pranu materialin të KQZ-së, ua kemi lejuar zyrën ne jemi në rregull. Unë nuk e kam menduar largimin, nëse dëshirojnë serbët ne jemi këtu. Vet Republika e Kosovës ia ka ofruar atë mundësi do të vijnë të punojnë me ligje dhe simbole në komunë këtu për shtetin e Kosovës unë jam shumë i kënaqur edhe nëse largona”, tha kryetari i Leposaviqit, Lulzim Hetemi.
Ai kërkon që pasardhësi i tij, të punon sipas Kushtetutës së Republikës.
“ Ai qytetar serb, që konkurron për me ardhë këtu në komunë, ai duhet me qenë i gatshëm të vjen dhe t’i respekton ligjet, Kushtetutën, flamurin edhe presidenten që e kemi këtu në fotografi”, u shpreh ai.
Në anën tjetër, Izmir Zeqiri nga PDK-ja, nuk beson se qytetarët e komunës me të cilën udhëheq, nuk do të votojnë largimin e tij nga posti.
“ Unë i respektoj të gjitha normat ligjore të Republikës së Kosovës, dhe momentalisht i kemi ofruar do të thotë edhe zyret dhe do të punojmë në drejtim të krijimit të kushteve për mbajtjen e këtij peticioni, ani pse unë mendoj dhe, kam besim pak edhe informacionet cfare janë, nuk mund të kalon në komunën e Zubin Potokut, 50.1% nuk do të mund të kalon”, deklaroi kryetari i Zubin Potokut, Izmir Zeqiri.
Më 19 maj 2023, katër kryetarët në komunat veriore, Leposaviq, Zubin Potok, Zveçan dhe Mitrovicë të Veriut, morën nën udhëheqje komunat e banuara kryesisht me serbë.
Pas daljes së tyre në objektet komunale, pati tensione në veri për çka mbetën të plagosur dhjetëra pjesëtarë të KFOR-it, u sulmuan edhe gazetarët.
