40 kryetarë fshatrash në komunën e Ferizajt u zgjodhën nga bashkëfshatarët e tyre në këto pozita.
Mirëpo të njëjtit ende nuk janë certifikuar nga Komuna.
Në njoftimin nga niveli lokal ishte bërë e ditur se i gjithë procesi pritej të kryhej brenda muajit dhjetor, por janë bërë gjashtë muaj dhe një gjë e tillë nuk ka ndodhur.
Fadil Lipovica që është emëruar në krye të fshatit Softaj, thotë se nga kjo po hasin në vështirësi në kryerjen e punës së tyre.
“Kemi kërkesa të shumta prej banorëve ku jem zgjedh dhe duhet t’i adresojmë kërkesat që duhet t’i dorëzojmë mirëpo ku është problemi nuk e dijmë ne jo vetëm se kemi angazhime tjera kemi edhe shpenzime duhet me ardhë prej fshatit në qytet me bë shpenzimin kërkesën me u kthy mirëpo certifikim nuk kemi… Është e vështirë se s’kemi të ardhura aq sa duhet dhe për këtë punë nuk kompensohemi hiq”, shprehet Lipovica.
E nga opozita në këtë Komunë thonë se me veprime të tilla, pushteti lokal po bën edhe shkelje ligjore.
“Udhëzimi administrativ përcakton qartë se për qytetet të cilat janë mbi 100 mijë banorë duhet të jenë 40 kryetarë të fshatrave, mirëpo këta nuk e kanë përfundu ende nuk i kanë certifiku ende kryetarët që janë zgjedh, numri është plotësuar. Mirëpo këta për arsye se kanë dashtë t’i bëjnë edhe dy këshilla tjerë, që është në Neredime dhe Kosinë për këtë arsye ende nuk ka përfunduar ky proces”, thotë Besim Haziri- asamblist i LDK-së për Tëvë1.
Asamblisti i LDK-së vlerëson se po tentohet që të ushtrohet ndikimi politik edhe në kryesitë e fshatrave.
“Sigurisht që është shqetësuese sepse është paraparë për një muaj me përfundua këtë numri është plotësu, kryetarët janë zgjidhë… Sigurisht se kemi kërkuar por nuk kemi marrë najfarë përgjigje konkrete diçka të saktë se për çka por vetëm e kanë shty ashtu”, shprehet Haziri.
Tëvë1 ka tentuar të marrë përgjigje nga Komuna e Ferizajt se pse ende nuk ka ndodhur certifikimi i kryetarëve të fshatrave, por që nuk kanë pranuar të flasin.
