Pas çdo të reshure me intensitet të lartë, kjo prrockë del nga shtrati. Kjo për shkak të hedhjes së mbeturinave të llojllojshme të cilat kanë bllokuar rrjedhjen e ujit.
Madje për shkak të këtyre, ujë përfshiu disa shtëpi në këtë lagje.
Uji depërtoi edhe në bodrumet e familjes Gjoshi në lagjen Kalabria.
Nga kjo familje thonë se kjo nuk është hera parë që për shkak të reshjeve të shiut shtëpia iu është dëmtuar.
“Nuk ka fjalë më përshkru sa keq po ndihem. Dëmet janë shumë të mëdha, pasi është hera e katërt që duhem me pastru shtëpinë, pra është hera e katërt që nxemjen duhem me nderru mos flasim për harxhimet tjera, peleti e thëngjilli, para një viti na është dashtë me shpenzu 46 mijë euro investim”, thotë Lumturie Gjoshi, banore në lagjen “Kalabria”.
Gjoshi thotë se kishte kërkuar ndihmë disa herë nga Komuna e Prishtinës por nuk kishte marrë përgjigje.
Ajo kërkon nga dikush përgjegjësi për të gjitha këto dëme të shkaktuara.
“Nuk e di kush duhet me dhënë këtë përgjegjësi, dikush duhet me dhanë përgjegjësi për këto telashe shpirtërore që jemi duke kaluar, se nuk është lehte me pa krejt kapitalin që bënë për vite tërë me shku dëme për një orë, ti e kontakton Komunën me orë të tërë telefonat nuk hape, dhe unë e kam një pyetje direkt për kryetarin e Komunës kush duhet me dhënë përgjegjësi”, shprehet ajo.
E nga Komuna e Prishtinës tregojnë arsyet pse nuk kanë mundur të përgjigjen kërkesës së këtyre banorëve për pastrimin lumit.
”Nuk ka pas kontratë valide nga drejtoria përkatëse, kontrata është në prokurim për shkak të ankesave nuk kemi kontratë valide për pastrimin e lumenjve, kjo nuk na pengon në pastrimin sot dhe do të vazhdojmë ta pastrojmë prapë”, ka thënë Lulëzim Fushtica, drejtor i Drejtorisë së Emergjencave në kryeqytet.
E shiu i së dielës, i shkaktoi dëme edhe Sali Gjinovcit, i cili pasdite ishte duke udhëtuar së bashku më familjen e tij kur vetura e tij u mbulua nga uji në lagjen Veterrnik.
“Unë jam kanë me familjen teme, rrugës perniherë ka ardhur si një digë e ujit, si me leshu dikush me pullë, nuk e di qysh i kam nxjerrë gruan dhe fëmijët prej veturës, veturën e kam lanë aty e ka marrë uji deri ne tavan. Kerri tash është i demoluar nuk vynë asgjë, por askush nuk u ardh”, thotë ai.
Stuhia në mbrëmjen e së dielës shkaktoi probleme edhe në Qendrën Klinike Universitare të Kosovës.
Përveç Prishtinës, shiu përfshiu edhe Fushë Kosovën, e vendet përreth.
Teksa disa rajone mbeten edhe pa energji elektrike.
