Kryeprokurori i Prokurorisë Speciale të Republikës së Kosovës, Blerim Isufaj, ka pritur në takim shefin e ri të EULEX-it, Giovanni Pietro Barbano, raporton teve1.info
Sipas një komunikate për medie të Prokurorisë Speciale, gjatë këtij takimi Kryeprokurori Isufaj, e ka uruar shefin e EULEX-it, për detyrën e re, me ç‘rast e ka vlerësuar si të rëndësishëm rolin e këtij misioni në monitorimin e punës së institucioneve gjyqësore, me theks të veçantë të Prokurorisë Speciale.
Po ashtu, kryeprokurori Isufaj e njoftoi shefin e EULEX-it me punën, sfidat dhe objektivat e këtij institucioni, në funksion të fuqizimit të Prokurorisë Speciale, si dhe ngritjes së besimit të qytetarëve në institucionin që ai drejton.
“Bashkëbiseduesit shprehën nevojën e thellimit të bashkëpunimit me qëllim të forcimit të sundimi të ligjit në Republikën e Kosovës”, thuhet në komunikatë.
Ndërkaq, kreu i EULEX-it, Pietro Barbano, shprehu gatishmërinë e tij që brenda mandatit të cilin e ka ky mision, të përkrah dhe mbështes punën e Kryeprokurorit të Prokurorisë Speciale dhe të gjithë prokurorëve vendorë.