Kryeministri i Spanjës, Pedro Sánchez , ka bërë thirrje që Izraeli të përjashtohet nga garat ndërkombëtare sportive për aq kohë sa vazhdon “barbarizmi” i tij në Gaza, duke thënë se vendi nuk duhet të lejohet të përdorë ngjarje të profilit të lartë për të “zbardhur” ofensivën e tij.
Duke folur një ditë pasi demonstruesit pro-palestinezë detyruan një ndërprerje të parakohshme të garës së çiklizmit Vuelta a España mes skenave kaotike dhe përleshjeve me policinë, Sánchez tha se kishte “një admirim të thellë” për të gjithë ata që kishin protestuar në mënyrë paqësore kundër pjesëmarrjes së ekipit Izrael-Premier Tech.
Kryeministri – i cili është kritikuar ashpër nga kundërshtarët e tij për lëvdatat e protestuesve disa orë para se gara të duhej të ndërpritej – tha se shpresonte që ngjarjet e së dielës në Madrid do t’i bënin të tjerët të rishqyrtonin nëse Izraeli duhet të përfshihej në ngjarjet e mëdha sportive, shkruan Guardian.
“Mendoj se debati që ka filluar pas asaj që ndodhi dje këtu në Madrid duhet të zgjerohet dhe të përhapet në të gjitha cepat e botës”, tha ai të hënën.
Sánchez ka vënë në dyshim vazhdimisht “standardet e dyfishta” të bashkësisë ndërkombëtare mbi Ukrainën dhe Gazën dhe tha në maj se Izraeli duhet të përjashtohet nga konkursi i këngës në Eurovision – një thirrje të cilës i bëri jehonë ditët e fundit edhe ministri i kulturës i Spanjës.
