“Thojshin buxheti i shteti do të bëhet më i madh se bruto produkti vendor. Çfarë hajvanash. Ose jepshin premtime për koeficient, ma shumë se programi i tyre. Çfarë hajvanash. Por, ka kalu koha e hajvanitit.”
Gjuhë të tillë, përdori pak orë pas mbylljes së kutive të votimit në zgjedhjet parlamentare të 9 shkurtit.
Javë më pas, krahasime të njëjtë, përmes garfiteve në hapësira publike u bën karshi kryeministrit.
Kjo shihet si shkak – pasojë e deklarimeve të vetë shefit të ekzekutivit.
“Në shumë vende të botës, edhe kryetarët por edhe figurat publike i nënshtrohen këtyre parullave dhe nuk ka pothuajse asnjë reagim. ‘Djallin nga shishja’ e ka nxjerrë Albin Kurti, dhe tash është një çështje që nuk mund të ndalet. Por, në qoftë se Albin Kurti do të ishte pak më i vëmendshëm, edhe pse ka thënë se çfarë ka thënë, e të dilte pas një dite duke kërkuar falje, kjo çështje do të ishte harruar dhe nuk do të merrej askush me të”, ka deklaruar Behxhet Shala nga KMDLNJ.
Megjithatë, një gjuhë e tillë, vlerësohet se nuk do duhej të bënte pjesë në komunikimin publik.
“Na duhet me evidentu se për herë të parë kjo është përdorur nga ana e politikës, drejtuar një grupacioni tjetër politik, dhe po kthehet në të njëjtën monedhë për politikanët. Normalisht, nuk është gjuhë që do duhej të përdorej në sferën publike, sepse është gjuhë që ka për qëllim fyerjen e kundërshtarit politik”, ka pohuar profesori i gazetarisë, Alban Zeneli.
Gjuha e përdorur në grafite, konsiderohet se ka tejkalim të lirisë së shprehjes, gjë për të cilën personat ndaj të cilëve janë thënë fjalë fyese mund t’i drejtohen organeve të drejtësisë.
“Janë të ndaluara në kuptim të ligjit civil kundër fyerjes dhe shpifjes, për faktin se përbëjnë deklarata të natyrës fyese, e në rrjedhë të kësaj kushdo që ndihet i tillë mund të iniciojë padi në Gjykatë për kompensim dëmi, përkatësisht kundër fyerjes dhe shpifjes”, ka deklaruar avokati, Ardian Bajraktari.
Televizioni ka tentuar të marrë informacione nga Policia e Kosovës për veprimet që i kanë marrë në rastet e dy grafiteve me gjuhë fyese ndaj kryeministrit, por nuk ka marrë përgjigje.
