Ministri i Punëve të Jashtme të Shqipërisë, Igli Hasani, në një konferencë për media nga Prishtina iu ka referuar Serbisë duke thënë se në shekullin 21, nuk i çohen më ushtri fqinjit të kufiri.
“Shqipëria iu bën thirrje të gjithë faktorëve që jetojnë në shekullin 21, që nuk i çohen më ushtri fqinjit te kufiri dhe se askush s’duhet të vazhdojë një lojë të tillë, që është qesharake”, ka bërë thirrje ai.
Ai është pyetur gjithashtu nëse vizita e tij ndërlidhet me shqetësimet e fundit të ngritura nga Kosova për sulme të mundshme nga Serbia.
Hasani ka thënë se Shqipëria në çdo rast, në të mirë e në të keq do të jetë afër Kosovës dhe afër shqiptarëve të Kosovës.
“Kosova ka një aleatë të përjetshëm të padiskutueshëm që është Shqipëria. Në çdo rast e çdo moment, në të mirë e në të keqe, Shqipëria do të jetë këtu pranë Prishtinës dhe pranë shqiptarëve të Kosovës”, ka thënë Hasani.
Ai tutje ka thënë se Shqipëria i ndjek me vëmendje zhvillimet në rajon dhe gjithashtu edhe në kufijtë e Republikës së Kosovës.
Ai në fund është shprehur se garancia e sovranitetit dhe integritetit territorial të Kosovës është NATO dhe se Shqipëria është pjesë e Aleancës Veri-Atlantike.
“Ne i ndjekim me vëmendje zhvillimet në rajon, dhe në kufijtë e Republikës së Kosovës. Bëjmë thirrje gjithë aktorëve dhe faktorëve që jetojnë në shekullin 21, nuk i cohën ushtri fqinjit më te kufiri, dhe askush s’duhet të vazhdojë më këtë lojën sepse është qesharake. Sepse të gjithë jemi qartë se garancia më e madhe për sovranitetin dhe integritetin e Kosovës është NATO ku edhe Shqipëria është pjesë”, ka thënë Hasani./teve1.info/
