Ka ditë që janë vendosur, mirëpo janë akoma jofunksional.
Por ende pa u vënë në punë, dikush po i sheh si dështim.
Asamblisti i Vetëvendosjes në komunën e Prishtinës, Gëzim Sveçla thotë se vendime të tilla, janë vetëm eksperiment i kryetarit, Përparim Rama.
“Tash e tri vjet e gjysmë prej ardhjes në pushtet të Përparim Ramës dhe LDK-së, ne si qytetarë të Prishtinës i jemi nënshtruar eksperimenteve të ndryshme nga ky ekzekutiv të cilat kanë rezultuar vazhdimisht të pasuksesshme. Kemi pasur testet për vozitje një kahje, pastaj rrugët një kahje që janë shndërruar sërish në rrugë dy kahëshe e veprime të tjera të cilat merren pa analiza të mirëfillta, vetëm për t’u dukur se po bëjmë diçka, ndërkohë që rezultati janë kolonat kilometrike siç nuk i ka pasur Prishtina asnjëherë më parë”, thotë ai.
Këta semaforë në lagjen “Pejton” në kryeqytet po i sheh të panevojshëm edhe eksperti i komunikacionit, Lavdim Hamiti.
Sipas tij, vendosja e tyre në këtë zonë, vetëm do ta rëndojë trafikun.
“Ajo është një pjesë shumë e frekuentuar. Duhet të bëhet një zgjidhje që të lirohet ajo pjesë e komunikacionit dhe jo të ngarkohet. Nuk është që semafori ka me liru atë pjesë të komunikacionit, përveç se ka me ngarku edhe më tepër se sa që është. Në atë pjesë, por edhe në pjesë të tjera duhet të bëhen rrugë alternative apo të bëhen rrugë një kahëshe. Ajo rrugë shumë mirë ka qenë një kahore, ku nuk ka pasur pengesa, nuk ka pasur pika konflikti e ka qenë një komunikacion pakëz më i lehtë”, vlerëson Lavdim Hamiti –ekspert i komunikacionit.
Mirëpo, nga komuna e Prishtinës mendojnë ndryshe.
Donat Lushaku, zëdhënës i kësaj komune, thotë se një ndërhyrje në këtë pjesë ka qenë e domosdoshme.
“Është bërë një analizë dhe është bërë një propozim i tillë, ne si kabinet e kryetari në përgjithësi e ka miratuar dhe do të shohim si do të funksionojë. Por, duhet të dimë një gjë, kemi një dinamikë mjaftë të madhe në kryeqytet të punëve, kemi një dinamikë mjaft të madhe të trafikut dhe nuk po i quajmë eksperimentime që me i bezdisë qytetarët, por pa i bërë këto testime nuk po e dimë saktë deri në finale se si do të funksionojë në mënyrë më të mirë edhe trafiku”.
Sipas Lushakut, këta semfaorë do të vihen në funksion shumë shpejt.
