Mesfushori shqiptar i Interit, Kristjan Asllani ndihet i lumtur me golin e bukur të shënuar ndaj Udineses dhe kalimin tutje në Kupën e Italisë.
Interi fitoi me rezultat 2-0 ndeshjen ndaj Udineses në fazën e 1/8-tës së Kupës së Italisë dhe kaloi në çerekfinale falë golave të Marco Arnautovic (30’) dhe Asllanit (45+).
Goli i shënuar nga ylli i kombëtares shqiptare ishte fantastik pasi erdhi direkt nga rivënia këndore dhe ky gol e bëri të lumtur atë.
“Nuk më kishte ndodhur kurrë të shënoja gol direkt nga këndi. Megjithatë sonte e rëndësishme ishte fitorja dhe jemi të lumtur sepse po u japim vazhdimësi rezultateve”, ka thënë fillimisht Asllani për faqen zyrtare të klubit.
“Grupi ynë është fantastik, ka një kimi të madhe mes nesh në dhomat e zhveshjes, ne dalim shpesh bashkë dhe kjo gjithashtu çon në rezultate”.
“Më duhet të falënderoj edhe Arnautovicin për mbështetjen e tij, sepse ai është një nga ata që gjithmonë ndihmon më të rinjtë dhe është thelbësor për të gjithë ne”, përfundoi mesfushori shqiptar.
