Në fazë gjykimi, një numër i vogël i prokurorëve ka në duar që t’i sjell para gjykatës autorët e krimeve të luftës.
Nga katër sa ishin gjithsej, kanë mbetur vetëm tre prokurorë të kategorizuar për krime lufte.
“Aktualisht, Prokuroria Speciale e Republikës së Kosovës ka tre prokurorë të profilizuar për ndjekjen dhe hetimin e krimeve të luftës, nga katër sa ishin deri tani, për shkak se prokurorja Drita Hajdari ka dalë në pension”, ka thënë Bedri Gashi, u.d i udhëheqësit të njësisë për komunikim me publikun në KPK.
Me këtë zvogëlim të numrit të prokurorëve, vlerësohet se ndikohet efektshmëria e ndjekjes së krimeve të luftës.
Megjithëse Ministria e Drejtësisë, ka ndarë buxhet për shtimin e prokurorëve, kjo nuk ka ndodhur.
Për këtë, ky dikaster u shpreh se është kompetencë e KPK, duke mos dhënë sqarime të mëtejme.
Puna e sistemit prokurorial shihet si sfiduese duke marrë për bazë se sa voluminoze janë dosjet e krimeve të luftës.
Vetëm këtë vit, janë dhënë dy verdikte për krime lufte, një lirues dhe një dënim prej 13 vitesh.
