Me homazhe në përkujtim të viktimave, shënohet 24-vjetori i sulmit terrorist të 11 shtatorit 2001, i cili mori rreth 3 mijë jetë njerëzish dhe ndryshoi historinë e Shteteve të Bashkuara të Amerikës
Presidentja e vendit, Vjosa Osmani së bashku me kryeministrit në detyrë, Albin Kurti dhe me kryetarin e Kuvendit kanë bërë homazhe në kujtim të viktimave të sulmeve terroriste të 11 shtatorit në ShBA.
Presidentja Osmani theksoi se Kosova qëndron me krenari në luftën kundër terrorizmit, kudo që ai ndodh.
“Në atë ditë, bota u nda në dysh: në ata që thellësisht besojnë në vlerat e lirisë, humanizmit dhe qëndrojnë bashkë në mbrojtje të këtyre vlerave dhe në luftën kundër terrorizmit, dhe në pjesën tjetër, ata që besojnë në terrorizëm dhe e përdorin atë për të shkaktuar dhimbje te të tjerët. Kosova, me krenari, ka qëndruar dhe qëndron krah SHBA-së për të luftuar terrorizmin, kudo që ai ndodh”, tha Osmani.
Mëngjesin e hershem homazhe ka bërë edhe kryetari i Aleancës së Ardhmërisë së Kosovës, Ramush Haradinaj.
Haradinaj tha se fati dhe ekzistenca e popullit shqiptar janë të lidhura ngushtë me SHBA-në.
Ai kujtoi 24 marsin e vitit 1999, kur Amerika i priu NATO-s në ndërhyrjen në Kosovë, duke nisur fushatën ajrore kundër caqeve serbe, çka sipas tij krijoi një lidhje të fuqishme gjaku mes shqiptarëve dhe Amerikës.
Haradinaj shtoi se më 11 shtator 2001, shqiptarët u tronditën nga sulmet terroriste në SHBA, ku humbën jetën shumë njerëz të pafajshëm, përfshirë edhe shqiptarë. /teve1.info/
Nisin homazhet në përkujtim të viktimave të 11 shtatorit në ShBA
