Kremlini ka thënë se dokumenti i ri i strategjisë së sigurisë kombëtare të administratës amerikane është “kryesisht në përputhje” me vizionin e Rusisë.
“Rregullimet që po shohim, do të thoja, janë kryesisht në përputhje me vizionin tonë”, i tha zëdhënësi i Kremlinit, Dmitry Peskov, gazetarit rus Pavel Zarubin në një intervistë, një fragment i së cilës u nda në Telegram të dielën, të cilin e citon Anadolu.
Peskov shprehu shpresën e Moskës se kjo mund të jetë një “garanci modeste” se ata do të jenë në gjendje të vazhdojnë punën e përbashkët konstruktive për gjetjen e një zgjidhjeje në Ukrainë.
Ai argumentoi më tej se pozicioni politik i brendshëm i Presidentit të SHBA-së, Donald Trump, është i fortë, gjë që i lejon atij të përshtasë strategjinë e sigurisë kombëtare të vendit sipas vizionit të tij.
Peskov tha gjithashtu se Rusia mbështet gjuhën në dokument, i cili sipas tij përmbante deklarata “kundër konfrontimit dhe në favor të dialogut dhe ndërtimit të marrëdhënieve të mira”.
Strategjia e Sigurisë Kombëtare (NNS), e publikuar të premten, kritikoi “pritjet jorealiste” të zyrtarëve evropianë për luftën midis Rusisë dhe Ukrainës, duke thënë se SHBA-të kanë një “interes thelbësor” në përfundimin e konfliktit, shkruan Al Jazeera.
NNS fajësoi, pa dhënë shembuj, “përmbysjen e proceseve demokratike” për atë që e përshkroi si mosreagim të disa qeverive evropiane ndaj dëshirës së popujve të tyre për paqe.
Dokumenti sugjeroi gjithashtu që SHBA-të mund të tërheqin ombrellën e sigurisë që e kanë mbajtur prej kohësh mbi kontinentin e vjetër.
Në vend të kësaj ajo propozon që Evropa të veprojë si një grup kombesh sovrane të bashkuara, dhe të marrë përgjegjësinë kryesore për mbrojtjen e vet.
