Për mbi 15 orë u ra të prisnin.
Kjo pasi u ndaluan nga policia serbe gjatë kthimit për në Kosovë.
Udhëtarët të cilët ishin po udhëtonin me autobusë dhe vetura u ndaluan nga autoritetet serbe në vendkalimet kufitare te Dheu i Bardhë dhe Merdare.
E pas disa orësh të gjata, disa nga udhëtarët u liruan.
E ndër pyetjet që iu ishin bërë ishte edhe nëse kanë qenë pjesëtar të UÇK-së, Policisë së Kosovës apo FSK-së.
Kosovarët e parë që u liruan, i thanë televizionit se nuk ishte i lehtë qëndrimi në territorin e Serbisë.
Njëri nga ta edhe u dënua me 400 euro dhe me 3 muaj ndalesë për të hyrë në Serbi.
I njëjti tha se përveç gjobave po bëhet edhe ndalim hyrja ne Serbi për tre muaj.
“Me ndaluan kinse për shpejtësi, më dënuan 400 euro, ma ndaluan hyrjen për 3 muaj. Jam punëtor i bartjes së kufomave, po na maltretojë, po i ndalin edhe veturat e tjera”, tha qytetari.
Për këto veprime të Beogradit zyrtar, reagoi presidentja Vjosa Osmani.
Sipas saj, përgjegjës për këtë është Aleksandar Vuçiq.
“Serbia po hakmerret ndaj qytetarëve të Kosovës, një ditë pas votimit të KiE-së, duke mbajtur pengje në pikat kufitare, duke i frikësuar, konfiskuar dokumente dhe duke i privuar nga ushqimi. Përgjegjës për këtë është një njeri: Vuçiqi”, deklaroi Osmani.
Të njëjtin mendim e pati edhe kryeministri Albin Kurti.
Gjatë kohës sa ekipi i televizionit ka qëndruar në vendkalimin kufitar Merdare, kanë kaluar vetëm dy autobusë me udhëtarë nga Kosova.
