Kryetari i Partisë Demokratike të Kosovës (PDK), Memli Krasniqi, ka akuzuar Lëvizjen Vetëvendosje (VV) për vazhdim të qëllimshëm të bllokadës në Kuvendin e Kosovës. Sipas tij, VV po tregon më shumë përkushtim për zgjedhjen e Nenad Rashiqit si nënkryetar të Kuvendit, sesa ka treguar më herët për figura të larta të vetë subjektit, si Albulena Haxhiu apo Dimal Basha.
“Po e shihni që përkundër faktit që PDK e mbajti zotimin e vet të dhënë para qytetarëve me qëllim të zhblokimit, me gjithatë VV-ja ka plan vazhdimin e bllokadës. Edhe sot po e vëreni që këtu ka një tentim që të mos shkohet me konstituimin e Kuvendit,” deklaroi Krasniqi, duke shtuar se është i befasuar nga angazhimi i VV-së për Rashiqin.
Ai gjithashtu vlerësoi se mënyra aktuale e votimit për nënkryetarët është jokushtetuese dhe kjo është arsyeja pse deputetët e PDK-së kanë abstenuar.
“Ne po abstenojmë, sepse e dinë që mënyra e votimit është jo kushtetuese. Është skenar. Pse se mbyllën votimin te ndonjë kandidat tjetër, por pikërisht te Nenadi? Është jo kushtetuese,” shtoi Krasniqi.
Duke përmendur zhvillimet e mëhershme në Kuvend, ai kujtoi se kishte një tentativë për ndarje të votimit edhe për nënkryetarët shqiptarë, por që u tërhoq, ndërsa për përfaqësuesit e komuniteteve – procedura vazhdoi.
Megjithatë, Krasniqi tha se PDK nuk ka plan apo interesim që këtë çështje ta dërgojë në Gjykatën Kushtetuese.
