Ai thotë se afatizimi i dialogut është shpikur nga kryeministri Albin Kurti, pasi edhe në bazë të planit franko-gjerman s’ka afatizim për ujdinë finale.
Sipas tij, afatizimi i padeklaruar nga ndërkombëtarët nënkuptohet fundi i vitit 2023 dhe fillimi i vitit 2024.
“Afatizimin e ka shpikur kryeministri Kurti për të munduar të krijojë një narracion që është i pranueshëm për militantët e tij. Afatizim nuk ka nga partnerët ndërkombëtarë. Afatizimi padeklaruar nënkuptohet fundi i 2023, fillimi i 2024 sepse është një periudhë ku nuk ka zgjedhje në ShBA, BE, Gjermani dhe Francë, por as në Kosovë dhe Serbi së paku të planifikuara. Duke pasur këtë, ata besojnë se mund të ketë një përparim. Por unë personalisht nuk kam pritur dhe as nuk pres që të ketë një marrëveshje kaq shpejtë”, thotë ai në një intervistë për Kosovapress.
Kryeministri i Kosovës kishte deklaruar disa herë se një marrëveshje me Serbinë mund të arrihet në mars.
Madje ai kishte thënë se një plan të tillë e ka edhe BE e SHBA.
“Sa i përket kohës, në paragrafin e katërt të deklaratës së 23 nëntorit të zotit Borrell, thuhet se ‘në ditët në vijim do t’i ftojë palët që të diskutohet për hapat e ardhshëm brenda kornizës së propozimit, me qëllim që t’i prezantojmë rezultatet, para takimi të grupit special për normalizim me Kosovën dhe të rejave të takimit të ardhshëm për kapitullin 35 për Serbinë. Kjo përkthehet pranvera e vitit të ardhshëm, nuk mund të jetë ndryshe, sepse në ftesën që na është bërë neve, ka qenë marsi i vitit 2023. Vetë BE dhe SHBA duan dinamikë të re”,kishte thënë Kurti në një deklarim në Kuvend./Ksp/
