Krasniqi ka thënë se Hovenierin e ka informuar për qëndrimin e PDK-së rreth procesit të zgjedhjeve në veri.
“Sot, prita në selinë e Partisë Demokratike të Kosovës, ambasadorin e Shteteve të Bashkuara të Amerikës në vendin tonë, Jeffrey Hovenier. Në këtë takim diskutuam për zhvillimet e fundit politike në Kosovë, më theks të veçantë gjendjen e sigurisë në pjesën veriore të vendit dhe procesin zgjedhor në katër komunat atje. Ambasadorin Hovenier e informova për qëndrimin e PDK-së rreth këtij procesi. Ne i jemi përgjigjur Dekretit të Presidentes për këtë proces zgjedhor dhe në respektim të afateve dhe ligjeve kemi propozuar kandidatët tanë për kryetarë dhe asamblistë në katër komunat në veri”, ka shkruar ai në një postim në Facebook.
Po ashtu, i pari i PDK-së thotë se presin nga Qeveria dhe institucionet e Kosovës që të sigurojnë kushtet për mbarëvajtjen e procesit zgjedhor.
“Presim nga Qeveria dhe institucionet e Kosovës që të sigurojnë kushtet e favorshme për mbarëvajtjen e procesit zgjedhor. Garantimi i sigurisë për secilin qytetar të Republikës së Kosovës duhet të jetë prioritet kryesor”, tha ai.
Hovenier ka takuar edhe kreun e LDK-së, Lumir Abdixhikun me të cilin ka diskutuar për aktualitetin në vend me theks për gjendjen e sigurisë. /Teve1.info/
