Kryetari i Partisë Demokratike të Kosovës, Memli Krasniqi deklaroi se kreu i LVV-së, Albin Kurti nuk do ta propozojë Fatmir Limajn për kryeparlamentar. Sipas tij, mungesa e transparencës në diskutimet mes Kurtit dhe Limajt është “shenjë që diçka nuk është në rregull”.
Kështu u shpreh Krasniqi pas ndërprerjes së seancës, ku tha se nuk beson që Limaj do të jetë kandidat për kryeparlamentar
“A e keni parë ju ndokund që është kandidat? E para, unë nuk besoj kurrë që do të jetë kandidat, sepse një gjë të tillë ia kam thënë edhe atij personalisht, nuk e emëron, nuk e propozon Albin Kurti asnjëherë. Kështu që për këtë temë besoj që s’kemi me pas as arsye me e diskutu, përveç në mënyrë hipotetike… Mungesa e transparencës nga të dyja palët është pak një shenjë që diçka nuk është në rregull, besoj që ka të bëjë me apetitet pushtetore sepse nuk ma merr mendja që janë duke negociuar programin qeverisës me fol se sa duhet të rriten pagat ose se sa duhet të rriten pensionet. Ka të bëjë me pozicionime dhe me ndarje të pushtetit”, tha ai.
Ai tha se në Partinë Demokratike të Kosovës, 24 vota janë unike dhe se qëndrimi i tyre është i qartë.
“Siç e patë edhe sot bile ndoshta edhe në një mënyrë më degraduese se kurdo herë deri më tash, Lëvizja Vetëvendosje duke shfrytëzuar kryesuesin e seancës, Avni Dehari po e pamundëson me arbitraritet të plotë konstituimin e Kuvendit të Kosovës. Thirrja e Partisë Demokratike të Kosovës që nga 15 prilli ka qenë konsistente dhe e njëjtë, qytetarët kanë votuar që të kenë institucione, kuvend dhe qeveri, stabilitet dhe zhvillim por është obligim të gjithëve deputetëve që të luajnë rolin e tyre karshi besimit që ua kanë dhënë qytetarët në zgjedhjet e 9 shkurtit”, shtoi Krasniqi.
Kreu i Partisë Demokratike të Kosovës tha se pikëpyetje e madhe është se a kanë të drejtë konstituojnë kuvendin në ditën e 31-të.
“Ne kemi dërguar një lëndë në Gjykatën Kushtetuese, besoj edhe LDK po ashtu dhe deri tash nuk kemi marrë një aktgjykim. Kemi pritur shumë që kjo të ndodhë para datës 26, janë edhe tri ditë ndoshta do ta qartësonte së paku pjesën e votimit të fshehtë i cili në leximin tonë dhe të gjithë ekspertëve përveç atyre ekonomistëve të Vetëvendosjes që janë bërë ekspertë ligjor, të gjithë të tjerët e dimë që ndryshimi i rendit të ditës nuk mund të ndodhë. Nëse ne nuk arrijmë që ta konstituojmë kuvendin brenda 30 ditëve, pikëpyetje e madhe është se a kemi të drejtë ta konstituojmë në ditën e 31-të”, përfundoi ai.
