Kryetari i Partisë Demokratike të Kosovës, Memli Krasniqi, ka vizituar sot Komunën e Vushtrrisë, ku së bashku me Kryetarin Ferit Idrizi, kanë ndjekur nga afër punimet e rëndësishme infrastrukturore për transformimin e qytetit dhe përmirësimit të jetës së qytetarëve.
Nga atje, ai i ka bërë thirrje Qeverisë së Kosovës të mos i diskriminojë komunat në baza politike e partiake.
“Nëse duhet të ketë ndonjë shembull se si duhet të jemi në shërbim të tyre, mund të vijnë në Vushtrri ta shohin përmirësimin e jetës së qytetarëve. Ne sot jemi në përfundim të vitit 2023 dhe, fatkeqësisht, ky vit nuk është prej viteve të suksesshme të Kosovës. Është vit ku ka pasur regres e stagnim në shumë fusha, siç është dëshmuar edhe nga raportet ndërkombëtare. Por, besoj që secili prej nesh duhet të jetë në nivelin e detyrës për të dhënë maksimumin siç po e jep në Komunën e Vushtrrisë qeverisja lokale në krye me Kryetarin Idrizi”, ka thënë Krasniqi, thuhet në komunikatën e PDK-së.
Ai ka përgëzuar kryetarin e Vushtrrisë për punën e tij, duke thënë se është kthyer në një model të qeverisjes së mirë.
“Kryetari Ferit Idrizi, me punën e tij, me modelin e tij qeverisës, vërtetë është kthyer në një model të qeverisjes së mirë që i ka qytetarët në qendër. Me punën e tij, ai po përmirëson mirëqenien dhe jetën e tyre, është duke dhënë shembullin se si duhet të qeveriset në një komunë”, ka thënë Krasniqi.
Në Vushtrri, Krasniqi ka takuar edhe fermerët e sektorit të qumështarisë dhe bletarisë të kësaj komune. Bashkë kanë diskutuar për sfidat në ushtrimin e veprimtarive të tyre, mbështetjen konkrete që kanë marrë nga komuna dhe nevojën për përkrahje edhe më të madhe nga Qeveria e Kosovës./teve1.info/
