Kryetari i Partisë Demokratike të Kosovës (PDK), Memli Krasniqi, ka vizituar Komunën e Gjakovës, ku ka takuar sipërmarrës, prodhues dhe udhëheqës të qendrave inovative në këtë komunë.
Krasniqi bashkë me kryetarin e Degës së PDK-së, Hajdar Beqa dhe me kryesueses e Kuvendit Komunal, Arbreshë Kuqi, kanë diskutuar për sfidat me të cilat po përballen ata dhe të gjithë qytetarët e Gjakovës.
Në njoftimin për media kjo parti thotë se Qeveria Kurti po i diskriminon qytetarët e këtij vendi duke mos ndarë asnjë cent për investime për reja kapitale.
“Është për keqardhje që nuk ka një mbështetje për qytetarët e Komunës së Gjakovës, ashtu siç nuk ka pasur as për qytetarët e komunave të tjera. Por, është po ashtu për keqardhje që s’ka mbështetje as për ndërmarrësit e Komunës së Gjakovës, të cilët vërtetë me sfida të shumta, po arrijnë që të krijojnë vende pune, të mbajnë njerëzit në Gjakovë dhe po ashtu, të ndikojnë në zhvillimin ekonomik lokal”, ka thënë Krasniqi.
Ndërkohë, Beqa tha se ndërmarrësit po ballafaqohen me shumë sfida.
“Fatkeqësisht, edhe komuna jonë ka pësuar nga buxheti qeveritar për vitin 2024. Jemi diskriminuar dhe kemi zero investime kapitale për Gjakovën. Tash konkretisht jemi në ndërmarrjen “KoBa”, është një ndërmarrës i suksesshëm, një shembull i mirë, Zenun Bajrami, i cili ka pasur një aktivitet të madh në diasporë dhe tash ka ardhur dhe ka investuar në Kosovë”, tha Beqa./teve1.info/
