Përfaqësuesja e punëtorëve teknikë në Kuvendin e Kosovës, Nazife Krasniqi ka kërkuar që të rritet paga e tyre nga 275 euro në 450 deri në 500.
Në një intervistë për emisionin “Ditari” në Tëvë1, ajo tha se gjashtë vitet e fundit paga i është rritur vetëm dy herë nga 20 euro.
“Unë kam filluar punën me 5 korrik i kam bërë 20 vite të plota në Kuvendin e Kosovës, ka punëtore që punojnë tri vite, 23 vite, 5 vite. Që gjashtë vitet e fundit paga është rritur nga dy here nga 20 euro, tashmë e kemi 275 euro, neve në kontratë e kemi 275 euro, neve në llogarinë bankare”, ka deklaruar Krasniqi.
E pyetur për orarin e punës, ajo tha se shpesh herë punojnë jashtë orarit të punës, ngase ka seanca plenare.
Ndryshe, Krasniqi ka paralajmëruar se do të ketë prapë protesta nëse nuk iu realizohet kërkesat e tyre.
“Orari i caktuar është nga ora 07:00 mëngjesi deri në orën 15:00, por nëse ka seanca plenare vazhdon deri në orët e vonshme të ditës sepse jemi të obliguar me punua. Ne nuk po kërkojmë asgjë më shumë, vetëm paga të rritet dhe t`a kemi të dinjitetshme me pas pagën 450 euro deri në 500 euro. Pas shtatë ditësh ose dhjetë ditësh ne do të hyjmë në grevë nëse nuk kemi përgjigje, ne nuk do të kryejmë shërbime derisa të plotësohen kërkesat tona”, ka thënë Krasniqi.
Ndërkohë, punëtorët teknikë të Kuvendit të Kosovës kanë mbajtur të martën protestë para këtij institucioni. Ata po kërkojnë paga më të larta. E fajtor për gjithë këtë situatë sipas kryetarit të Sindikatës së Sektorit Privat, është kompania e cila çdo muaj merr 18 mijë euro, por punëtorët i paguan vetëm 275 euro./teve1.info/
