Kryetari i Partisë Demokratike të Kosovës, Memli Krasniqi, ka vizituar familjarët e ish- krerëve të UÇK-së, Hashim Thaçi, Kadri Veseli, Jakup Krasniqi e Rexhep Selimi, të cilët po mbahen në paraburgim nga Gjykata Speciale.
Krasniqi, ka thënë se ish- krerët e UÇK-së dhe shokët e tyre, simbolizojnë forcën dhe frymëzimin .
“Hashim Thaçi, Kadri Veseli, Jakup Krasniqi, Rexhep Selimi dhe shokët e tyre, simbolizojnë forcën, kurajon dhe frymëzimin i cili ka përbashkuar një popull. Pavarësisht nga muret dhe kufizimet, shembulli dhe emri i tyre në mënyrë të pashmangshme i tejkalon ato dhe shkëlqen mbi Kosovë, duke ndriçuar rrugën për brezat që do të vijnë. Sot, është obligimi ynë që ta vazhdojmë ëndrrën dhe punën e tyre për shtetndërtim e fuqizim të kombit tonë. Këtë ua thash edhe familjarëve gjatë vizitave të sotme te ta”, ka shkruar ai.
Tre vjet pas arrestimit të tyre, Krasniqi ka thënë se mund të kalojë edhe ndonjë vit tjetër i mbajtjes së tyre, por siç ka thënë ai “Dielli do të lind përsëri”.
Më 5 nëntor të 2020-s, ish-krerët e UÇK-së ishin arrestuar nga Gjykata Speciale nën dyshimin për krime lufte dhe ishin dërguar në Hagë për gjykim.
