Ministri i Administrimit të Pushtetit Lokal, Elbert Krasniqi, ka thënë se ky veprim po e shpërfaq fytyrën e vërtetë të Serbisë dhe qasjen e saj me situatën në veri të Kosovës.
I ftuar në emisionin “Info Nata”, Krasniqi tha se Qeveria është në veprim lidhur me situatën e krijuar atje, sepse sipas tij, Qeveria duhet të përkujdeset për bashkatdhetarët e bllokuar të cilet janë nisur për Kosovë.
“Kjo po e shpërfaq edhe njëherë fytyrën e vërtetë të Serbisë dhe qasjen e saj me situatën në veri, mirëpo edhe problemet që dëshiron t’i krijojë për shqiptarët, kosovarët dhe të tjerët edhe ata që vijnë nga diaspora. Unë ndihem keq për shkak se ka një numër të konsiderueshëm të qytetarëve tanë që në këto momente janë andej por jam i bindur që Qeveria është në veprim për këto situata me miqtë tanë ndërkombëtarë. Jam i bindun thash, nuk mund të konstatoj asgjë, por që duhet të jemi në veprim për shkak se janë bashkatdhetarët tanë familjarët tanë që janë nisur për Kosovë dhe ne duhet të përkujdesemi për ta”, tha ai.
Ndryshe sipas televizionit publik të Serbisë, atje është vendosur një kamion dhe traktorë, e të cilët do qëndrojnë deri në një njoftim të dytë./teve1.info./