Kryetari i PDK-së, Memli Krasniqi për 25-vjetorin e intervenimit të NATO-s në Kosovë, tha se për 78 ditë me radhë, bombardimet e NATO-s ndalën gjenocidin serb në Kosovë dhe i hapën rrugë fitores së Kosovës.
Krasniqi përmes një postimi në Facebook, ka shkruar se i rikujton miqtë e Kosovës, siç i ka quajtur ai, të shtrenjtë që kanë qenë aty në orët më të errta.
“Sot, derisa shikojmë përparimin që kemi bërë si vend, sfidat nëpër të cilat kemi kapërcyer dhe ëndrrat që kemi realizuar në ndërtimin e një shteti – ne rikujtojmë miqtë tanë të shtrenjtë që ishin aty për ne në orët tona më të errëta”, ka shkruar Krasniqi.
Ai tutje tha se mirënjohja për forcat e NATO-s është e përhershme dhe e paharruar.
“Prandaj, mirënjohja për forcat e NATO-së, të prira nga SHBA-të, është e përherhshme dhe e paharruar. Sot, Kosova qëndron si një testament i fuqisë së unitetit, guximit dhe qëndrueshmërisë së botës demokratike”, shkroi Krasniqi
Ndryshe, ai ka uruar që Kosova të jetë sa më shpejtë pjesë e NATO-s.
“Megjithatë, nga zemra, duke uruar që shumë shpejtë të jemi edhe ne pjesë e saj, për aleancën e NATO-s kemi vetëm një fjalë: Faleminderit!”, deklaroi Krasniqi./teve1.info/
