Kryetari i PDK-së, Memli Krasniqi në hapjen e fushatës zgjedhore për zgjedhjet e përgjithshme thotë se Kosova meriton dhe mundët më mirë.
Krasniqi deklaroi se një Kosovë më e mirë do të jetë ajo e cila do të udhëhiqet nga Bedri Hamza.
“Jam i bindur që me shumicën e qytetarëve tanë, besoj se Kosova meriton dhe mundet më mirë. Besoj në një Kosovë më të mirë, në një Kosovë që çdo qytetarë mund të jetojë me dinjitet e krenari dhe me më shumë mundësi. Kjo Kosovë më e mirë është e mundshme. Një Kosovë më e mirë është ajo, e cila do ta bëjë Bedri Hamza me ekipin e PDK-së”, tha i pari i PDK-së.
Ai tha se PDK-ja e bën më të fortë Kosovën, andaj në krye të ekipes udhëheqëse është zgjedhur Bedri Hamza.
“Sot, qëndroj këtu para jush se ne ju sigurojmë një plan konkret, një program të detajuar dhe gjithëpërfshirës, realisht të realizueshëm, i cili ofron cilësinë e jetës së qytetarëve tanë për ta bërë Kosovën më fortë dhe më të mirë, për këtë ne e zgjodhëm Bedri Hamzën që të na prijë në këto zgjedhje. Sepse, Kosovën i duhen aftësitë, përvoja dhe personaliteti për ta materializuar e profilizuar materialin tonë transformues”, tha ai.
Krasniqi, nga Salla “1 Tetori” në Prishtinë, ka përshëndetur dy liderët e UÇK-së dhe PDK-së, Hashim Thaçin e Kadri Veselin, si dhe Jakup Krasniqin e Rexhep Selimin.
“E di që sikur mua, po ju mungojnë shumë secilit prej jush, e mezi po e presim rikthimin e tyre në Kosovë, pranë familjeve e miqve, por, deri atëherë, le t’ua bëjmë një premtim. Kosovën do ta bëjmë ma të mirë, sepse kjo është ajo që ne bëjmë dhe kemi bërë gjithmonë. Partia Demokratike e Kosovës është gati për këtë detyrë. Partia Demokratike e Kosovës është gati për fitore”, tha Krasniqi./teve1.info/
