Elbert Krasniqi ministër i Administrimit dhe Pushtetit Lokal, ka deklaruar se të gjitha institucionet paralele në Kosovë do të mbyllen pasi nuk ka hapësirë për asnjë të tillë në vend.
Krasniqi, ka thënë se nuk do t’i bëjë publike komunat paralele që do të mbyllen, mirëpo ka theksuar se mbyllja e tyre do të ndodhë shumë shpejt.
“Nuk kam çfarë shtoj pos që nuk ka në Kosovë hapësirë për asnjë institucion paralel të shtetit. Ato do të mbyllen që të gjitha edhe tash mund të kemi diskutime pse është mbyllur kjo dhe pse nuk është mbyllur ajo, mirëpo gjithçka që mund të them se të gjitha do të mbyllen. Unë para disa ditësh kam pranuar nga një media edhe kërkesën që ti bëjë publike cilat janë komunat paralele edhe ku janë edhe kur do të mbyllen po sigurisht që nuk do të shkojmë kështu me një publicitet se ku janë dhe kur do të mbyllen por që të gjitha do të mbyllen dhe ato shumë shpejt”, ka thënë ai në një konferencë për media pas mbledhjes se qeverisë.
Ndryshe, pas mbylljes së komunës paralele të Skenderajt në veri të Mitrovicës, Tëvë1 ekskluzivisht ka siguruar se në veri të vendit operojnë ende strukturat paralele, asaj të Drejtorisë për Kulturë Rini dhe Sport, Drejtoria për Pagesat e Tatimit.
Ndërkaq, në lagjen e Boshnjakeve, gjendet edhe ndërtesa katër kat, e cila vepron herë pas here në kuadër të komunës paralele serbe të Vushtrrisë, e afër saj gjendet objekti i ashtuquajtur zyrë e Serbisë për Kosovë përmes së cilës janë marrë të gjitha vendimet për komunat paralele, siç ka mësuar televizioni Tëvë1, kryetar i kësaj zyre është ish-kryetari i Zveçanit, Vuçina Jankoviq.
Ekskluzive – Dy drejtori të komunave paralele serbe operojnë kundërligjshëm në veri
