Kryetari i Partisë Demokratike të Kosovës, Memli Krasniqi pas dështimit të tentimit të njëmbëdhjetë të seancës konstituive të Kuvendit ka deklaruar se mund të vijnë edhe njëqind e njëmbëdhjetë herë të tjera por Albulena Haxhiu prapë nuk do të kalojë.
Krasniqi ka thënë se përgjegjësia për të bërë hapin e parë për zhbllokimin e situatës i takon Lëvizjes Vetëvendosje.
Ai e ka ftuar sërish LVV-në që të ndryshojnë propozimin e tyre dhe të vijnë me një kandidaturë të re.
“Përgjegjësia është e tyre, atyre iu takon që ta bëjnë hapin e parë, ata po e përsërisin të njëjtën por një gjë le ta kenë të qartë që kur nuk të pëlqen dhe nuk pajtohesh me të vërtetën e me realitetin nuk mund ta ndryshosh atë por duhet ta ndryshosh vetveten. I ftoj që ta ndryshojën këtë mentalitet autoritar imponues dhe të vijnë me një kandidaturë e cila mund ta zhbllokoj këtë situatë, përndryshe mund të vijmë edhe njëqind e njëmbëdhjetë herë të tjera me shumë keqardhje dhe duke u shtrënguar para qytetarëve të vendit tonë por Albulena Haxhiu nuk kalon”, ka thënë ai.
