Kryetari i Partisë Demokratike të Kosovës, Memli Krasniqi, ka thënë se arrestimi i kryeshefit të KEK-ut, ish-drejtuesit të Komitetit për Energji në Lëvizjen Vetëvendosje, Nagip Krasniqi është dëshmi e abuzimit të kësaj Qeverie në sektorin e energjisë.
Ai përmes një postimi në Facebook, ka thënë se kryeministri Kurti duhet të deklarohet për arrestimin e mikut dhe bashkëpartiakut të tij.
“Arrestimi i sotëm i kryeshefit të KEK-ut, ish-drejtuesit të Komitetit për Energji në Lëvizjen Vetëvendosje, Nagip Krasniqi, është dëshmia më e mirë e asaj që e kemi thënë për muaj të tërë – se Qeveria Kurti, abuzimet më të mëdha i ka bërë pikërisht në sektorin e energjisë, përmes skemave korruptive dhe keqpërdorimit të pushtetit absolut që e kanë instaluar në këtë sektor. Kryeministri Kurti duhet të deklarohet menjëherë për arrestimin e sotëm të mikut dhe bashkëpartiakut të tij, sepse sot e ka momentin të flasë për bojlera e filtera, që pretendonte se i kupton mirë e që sot po vërtetohet se në emër të tyre janë keqpërdorur miliona euro nga vartësit e tij”, ka shkruar ai ndër të tjera.
Sipas tij, abuzimet e Qeverisë Kurti me tërë zinxhirin e sektorit të energjisë, prej prodhimit e deri te konsumi i saj, nuk janë as të rastësishme dhe as pa dashje./teve1.info/
https://teve1.info/lajmet/arrestohet-drejtori-i-kek-ut-dergohet-ne-mbajtje-48-ore/
