Kryetari i Partisë Demokratike të Kosovës, Memli Krasniqi, ka kërkuar nga Qeveria e Kosovës që të luaj rol më aktiv dhe të përgjegjshëm për rikthimin sa më parë në shtëpi të tre zyrtarëve policorë që janë kidnapuar pesë ditë më parë.
Gjithashtu, i pari i PDK-së ka kërkuar nga kryeministri i Kosovës që të kaloj inatet e tij personale dhe të shtoj bashkëpunimin e koordinimin me aleatët ndërkombëtarë.
“Kërkoj nga Qeveria që të luaj një rol shumë më aktiv dhe të përgjegjshëm për rikthimin sa më parë në shtëpi të Rifat Zekës, Beqir Sefës e Shemsi Mustafës. Mbi të gjitha, kërkoj nga Kryeministri që të tejkaloj inatet e tij personale dhe të shtoj bashkëpunimin e koordinimin me partnerët tanë ndërkombëtarë – si mënyra më e shpejtë dhe efikase për lirimin e tyre”, ka shkruar Krasniqi në Facebook.
Për kidnapimin e tre zyrtarët policorë të Kosovës, Krasniqi ka shkruar se ende edhe pas pesë ditëve nuk ka informacione për gjendjen e tyre shëndetësore, trajtimin e tyre nga autoritet serbe, thotë fatkeqësisht edhe për asnjë vizitë te ata.
“Derisa Serbia dhe Vuçiqi po refuzojnë të lirojnë policët tanë dhe kundërligjshëm po i mbajnë në paraburgim, në anën tjetër, Kryeministri dhe Qeveria po na mbajnë në errësirë në lidhje me situatën e tyre”, ka shkruar tutje ai./teve1.info/
