Kryetari i Partisë Demokratike të Kosovës, Memli Krasniqi, ka reaguar lidhur me koeficientin e ri të pagave në vlerë prej 105 eurove. Ai ka shkruar se Qeveria Kurti dhe kryeministri i vendit, Albin Kurti, i kanë dhënë një tjetër goditje qytetarëve të Kosovës, por kësaj here afatgjate.
Derisa ka shtuar se ka zbritje të ndjeshme dhe degradim të profesioneve e pozitave të rëndësishme të shtetit.
“Sot, përmes zbulimit të koeficientit të pagave në vlerë prej 105 eurove, Qeveria e Kosovës dhe Kryeministri Kurti i kanë dhënë edhe një goditje tjetër, këtë herë afatgjate, të gjithë qytetarëve të Republikës së Kosovës që punojnë në sektorin publik.Për më tepër, pafytyrësisht, kjo Qeveri dhe ky Kryeministër janë në gjendje të mashtrojnë edhe publikisht në lidhje me pagat, përqindjet dhe rritjet që janë bërë. Ajo që po proklamohet si rritje, në fakt është manipulim dhe lojë fjalësh. Ku thirren në rritje, nuk ka kujdestari, shujta, meditje, bonuse dhe ka mashtrime të krahasimeve bruto dhe neto. Ku nuk ka rritje, ka zbritje të ndjeshme dhe degradim të profesioneve e pozitave të rëndësishme të shtetit”, ka shkruar Krasniqi në Facebook.
Sipas Krasniqit, ky vendim i Qeverisë cenon mirëqenien e qytetarëve të Kosovës.
“Atyre që me punën e tyre të dinjitetshme dhe të palodhshme mbajnë gjallë dhe në këmbë funksionimin e shtetit tonë”, ka shkruar tutje ai.
Madje, Krasniqi konsideroi se më këtë vendim u është bërë thirrje për rritje të numrit atyre qytetarëve që duan të largohen nga vendi, përfshirë këtu edhe dëmtimin e ekonomisë dhe funksionalizimin e vendit.
“Të gjithë, pa përjashtim, kanë merituar më shumë se sa kjo Qeveri u ka ofruar. Ky vendim, në krahasim me krizën ekonomike dhe inflacionin e madh, nuk u plotëson as për së afërmi nevojat dhe kërkesat e qytetarëve.Për më tepër, ky vendim është thirrje për rritje të numrit të atyre qytetarëve që dëshirojnë të largohen nga vendi dhe, rrjedhimisht, përcaktim për dëmtimin e ekonomisë dhe funksionalitetit të shtetit tonë. “T’ia rrisësh pagën vetes është hajni, është vjedhje” – thoshte Kryeministri Kurti me 1 mars të vitit 2018. Ndërsa sot, ai rriti pagën e tij në 1785 euro. Pra sipas gjuhës së tij, ai bëri vjedhje”, thuhet tutje në postimin e tij.
E në përmbyllje të tekstit, Krasniqi ka shkruar se sonte është vetëm nata e parë e një realiteti të ri të dhimbshëm./teve1.info/.
