Krasniqi përmes një shkrimi në “Facebook” ka thënë se më këtë kundërshtim pushteti po mundohet të mos ia lejojë një kauzë opozitës.
‘Nëse mazhoranca është duke bllokuar formimin e komisionit hetimor parlamentar për energjinë vetëm për të mos i dhënë kauzë opozitës, në fakt është duke bërë të kundërtën. Qeveria po rrezikon që çdo dyshim që ndërlidhet me keqpërdorim në sektorin e energjisë, të përdoret kundër tyre. Kjo strategji mund të jetë e duhura, vetëm nëse dëmet që mund të bëheshin nga të gjeturat e hetimit do të ishin më të mëdha”, ka shkruar Krasniqi.
Sipas tij, kundërshtimet e pushtetit janë të paqëndrueshme pasi thotë se çështja e formimit të komisioneve hetimore është përcaktuar qartë në Kushtetutë.
“Aspektet procedurale që janë ngritur për të kundërshtuar themelimin e komisionit janë të paqëndrueshme. Kushtetuta e Kosovës parasheh caktimin e komisioneve parlamentare për çështje hetimore me kërkesën e një të tretës së deputetëve. Ky është një detyrim të cilit Kuvendi nuk mund t’i shmanget. Grupi parlamentar që inicion themelimin e komisionit hetimor qartësohet në kërkesën për themelim, pavarësisht përkatësisë partiake të deputetëve nënshkrues. Mandati i deputetit është individual, dhe vendimi i tij nuk mund të konsiderohen si qëndrim i një grupi kolektiv, ashtu siç është grupi parlamentar. Vendimet e grupit parlamentar merren bashkërisht dhe ato përfaqësohen nga shefi i grupit”, ka shkruar Krasniqi.
Partitë opozitare janë duke kërkuar themelimin e një komisioni hetimor parlamentar pasi kërkojnë të hetohen disa çështje lidhur me menaxhimin e krizës energjike. Ndërkohë përfaqësuesit e Lëvizjes Vetëvendosje po e kundërshtojnë këtë kërkesë duke thënë se kërkesën për themelimin e komisionit e kanë nënshkruar të gjitha partitë opozitare dhe se nuk lejohet që komisionin ta udhëheq dikush që është pjesë e kërkesës për themelim të atij komisioni. /teve1.info/
