Kryetari i PDK-së, Memli Krasniqi ka kujtuar heroin Afrim Bunjaku në dy vjetorin e vrasjes së tij në Banjskë.
Krasniqi ka thënë se Afrim Bunjaku mbetet testament i guximit dhe përkushtimit për mbrojtjen e Republikës së Kosovës.
Derisa, ai ka kujtuar që dy vite nga akti terrorist, drejtësia nuk është vendosur duke thënë se kriminelët e strehuar e të mbajtur në Serbi duhet të dorëzohen dhe të përgjigjen para ligjit.
“Dy vite më parë, në Banjskë, ra heroikisht në krye të detyrës rreshteri i Policisë së Kosovës, Afrim Bunjaku, i vrarë nga terroristët serbë. Afrimi mbetet testament i guximit dhe përkushtimit për mbrojtjen e Republikës së Kosovës. Sakrifica e tij është e gdhendur në historinë tonë kombëtare dhe do të kujtohet përherë si shembull i nderit dhe i besës ndaj atdheut. Por, dy vite pas këtij akti terrorist, drejtësia ende nuk është vendosur. Kriminelët e strehuar e të mbajtur të paprekur në Serbi duhet të dorëzohen dhe të përgjigjen përpara ligjit, sepse vetëm kështu nderohet sakrifica e Afrimit dhe sigurohet e ardhmja e Kosovës”, ka shkruar Krasniqi./teve1.info/
