Kryetari i Partisë Demokratike të Kosovës, Memli Krasniqi ka thënë se është krenar me qeverisjen komunale të PDK-së.
Këtë deklaratë Krasniqi e bëri pasi sot Komuna e Skënderajt, e qeverisur nga kryetari Fadil Nura dhe ekipi i tij, janë shpallur kampion të Kosovës në Indeksin e Transparencës për vitin 2022, në raportin e fundit të Instiutit Demokratik të Kosovës.
I pari i PDK-së, përmes një postimi në Facebook ka theksuar se kjo është ajo çfarë ai dhe partia e tij e kanë premtuar për komunat në të cilat tashmë udhëheq PDK.
“Në mesin e dhjetë komunave më transparente dhe efikase janë edhe pesë komuna të tjera të qeverisura nga PDK, Mitrovica, Prizreni, Drenasi, Ferizaj dhe Hani i Elezit. Ndërkaq, në pjesën e parë të tabelës për qeverisje të mirë janë edhe Kaçaniku e Vushtrria. Kjo është ajo që kemi premtuar dhe, sot, jam tejet i lumtur dhe krenar që Kryetarët e komunave ku qeverisim ne, po përmbushin premtimet dhe vizionin tonë qeverisës: Transparent, profesional dhe në shërbim të qytetarëve. Faleminderit kryetarëve dhe ekipeve të tyre në Skënderaj, Mitrovicë, Prizren, Drenas, Ferizaj, Han të Elezit, Kaçanik dhe Vushtrri – për punën e mirë gjatë vitit të kaluar”, ka shkruar ai.
Tutje Krasniqi tha “le të jetë ky vetëm fillimi për një mandat efikas dhe që do të përmirësojë ndjeshëm komunat që ne qeverisim dhe jetën qytetarëve tanë që jetojnë aty”.
Ndryshe sot Instituti Demokratik i Kosovës në bashkëpunim me Transparency International Slovakia dhe me mbështetjen financiare të SlovakAid, publikoi Indeksin e Transparencës për Qeverisjen Komunale për vitin 2022.
Pesëmbëdhjetë komunat me rritjen më të lartë të transparencës krahasuar me vitin 2021 janë Skenderaj, Istogu, Deçani, Prizreni, Malisheva, Kamenica, Hani i Elezit, Dragashi, Drenasi, Klina, Juniku, Suhareka, Obiliqi, Lipjani dhe Graçanica./teve1.info./