Ish-ministri, Vesel Krasniqi, ka reaguar ndaj deklaratës së Ministrit të Financave, Hekuran Murati, i cili ka thënë se Prokuroria Speciale ka dëshmi të mjaftueshme për të ngritur aktakuzë ndaj tij.
Krasniqi përmes një komenti në llogarinë zyrtare të ministrit, iu është përgjigjur duke thënë se deklarata e Muratit është presion mbi Prokurorinë e Shtetit dhe në drejtësi.
“I nderuar Ministër shumë të paska prekur intervista ime për shkeljet tuaja që tashmë të gjithë qytetarët e Kosovës e kanë parë fytyrën e vërtetë të gënjeshtrave tuaja. Kjo që ju keni shënuar është drejtpërdrejt presion mbi prokurorin e shtetit dhe ndërhyrje në drejtësi. Dëmin më të madh që ia keni bërë këtij vendi është edhe prishja e marrëdhënieve me miqtë e Kosovës, tanimë jemi nën sanksione falë qeverisjes tuaj. Tu kisha lutur që të merreni me punët tuaja dhe jo me presion mbi gjyqësorin dhe prokurorin. Për ndryshe jam i gatshëm të kemi debat para publikut me ju”, ka shkruar Krasniqi.
Njëherit, Krasniqi i është referuar Muratit si shkelës i ligjit dhe kushtetutës, teksa ka përfshirë këtu ndërhyrje në komunat për marrjen e të hyrave vetanake e faljen e borxheve të tatimit në pronë.
Ministri Murati ka thënë sot gjatë ditës se Prokuroria Speciale ka të gjitha dëshmitë e nevojshme për të ngritur aktakuzë ndaj Krasniqit, teksa ka renditur disa shkelje, të cilat sipas tij ish-ministri i ka bërë, e me të cilat pretendon se ai duhet të japë llogari për to në institucionet përkatëse. /teve1.info/.
