Kryetari i Partisë Demokratike të Kosovës, Memli Krasniqi ka njoftuar se do të marrë pjesë në takimin e ftuar nga kryeministri në detyrë njëherit kryetari i Vetëvendosjes, Albin Kurti lidhur me konstituimin e Kuvendit.
Krasniqi ka thënë se ftesës do t’i përgjigjet pozitivisht duke parë nevojën urgjente për zhbllokim institucional.
“Duke besuar thellësisht se Republika e Kosovës ka nevojë urgjente për zhbllokim institucional dhe për rikthimin e funksionimit të rregullt të institucionit më të lartë legjislativ, si dhe për t’i hapur rrugë afateve kushtetuese për themelimin e Qeverisë, do t’i përgjigjem pozitivisht kësaj ftese për takim.Në këtë frymë, e inkurajoj z. Kurti që të reflektojë me përgjegjësi mbi situatën aktuale dhe të shfaqë vullnet të sinqertë për të mundësuar formimin e institucioneve të reja, në mënyrë që Kosova të ketë sa më parë një Kuvend dhe një Qeveri legjitime e funksionale”, ka shkruar Krasniqi.
Ai ka thënë se gjetja e një emri të pranueshëm për shumicën e deputetëve do të ishte hap i rëndësishëm për ecjen përpara.
“Në këtë kontekst, gjetja e një kandidateje apo kandidati të përshtatshëm, që gëzon mbështetjen e shumicës së deputetëve, do të ishte një hap i rëndësishëm përpara. Natyrisht, për çështjen e nënkryetarëve të Kuvendit nuk ka asgjë për të diskutuar, pasi kjo është një e drejtë e garantuar nga Kushtetuta dhe e përcaktuar qartë. Partia Demokratike e Kosovës, sikur gjithmonë, do të vazhdojë të sillet me përgjegjësi dhe seriozitet institucional, në përputhje me interesin shtetëror dhe qytetar”, ka shkruar ai.
Lidhja Demokratike e Kosovës e ka refuzuar ftesën e Kurtit.
Kurti të mërkurën u ka dërguar letër Krasniqit e Abdixhikut për një takim lidhur me konstituimin e Kuvendit.
Kurti u dërgon letër Krasniqit e Abdixhikut për takim para seancës të së enjtes
