Ministri në detyrë i Administrimit të Pushtetit Lokal dhe njëherësh deputet në Kuvendin e Kosovës, Elbert Krasniqi, ka deklaruar sot se Grupi Multietnik në Kuvend i është drejtuar Gjykatës Kushtetuese, me kërkesën që të mos e marrë për bazë ankesën e Listës Serbe, pasi sipas tij një vendim i tillë do të dëmtonte barazinë e përfaqësimit të komuniteteve joshumicë në institucionet e vendit.
Këto komente ai i bëri në një konferencë për media, ku foli në emër të Grupit Multietnik, pas vendimit të Gjykatës Kushtetuese për të miratuar një masë të përkohshme, e cila ndalon Kuvendin që të ndërmarrë hapa për formimin e Qeverisë deri më 30 shtator.
“Kemi kërkuar nga Gjykata Kushtetuese që të mos marrë për bazë ankesën e Listës Serbe, sepse kjo do të prishte balancin e respektimit të të drejtave të të gjithë komuniteteve jo shumicë dhe përfaqësimin në institucionet e vendit,” tha Krasniqi.
Sipas tij, nuk është e pranueshme që një komunitet të përdorë ulëset e garantuara për të bllokuar funksionimin institucional.
“Ne vlerësojmë që Kuvendi duhet të vazhdojë punën dhe asnjë komunitet nuk mund t’i shfrytëzojë ulëset e garantuara për të sjellë bllokadë, aq më tepër Lista Serbe,” theksoi ai.
