Kryetari i Partisë Demokratike të Kosovës (PDK), Memli Krasniqi, ka reaguar ndaj vendimit të Qeverisë për ndarjen e 100 eurove për studentët, vetëm pak ditë para zgjedhjeve lokale.
Krasniqi tha se ky vendim nuk përfaqëson mbështetje të sinqertë për studentët, por është një përpjekje e hapur për blerje votash nga një kryeministër që, siç tha ai, ka humbur çdo legjitimitet politik.
“Kryeministri në largim, i cili tashmë ka humbur çdo legjitimitet, duket se po e përjeton panikun nga humbja e madhe që e pret të dielën. Pas katër vitesh dështimesh në qeverisje dhe degradimi të sistemit arsimor, ai sot vendosi të ndajë 26 milionë euro, nga 100 euro për student, vetëm pesë ditë para zgjedhjeve. Kjo nuk është mbështetje e sinqertë për studentët, por përpjekje e hapur për blerje vote”, ka deklaruar Krasniqi në një postim në Facebook.
Ai shtoi se studentët kosovarë janë të vetëdijshëm dhe nuk do të mashtrohen nga veprime të tilla elektorale.
“Ky është një tjetër gjykim i gabuar për studentët kosovarë, sepse ata as nuk blihen e as nuk shiten. I ftoj studentët që t’i marrin ato mjete, që janë nga taksat e familjeve të tyre, por të dielën ta përdorin votën e tyre për ta ndëshkuar një kryeministër që ka rrezikuar të ardhmen e tyre dhe të shtetit”, tha ai.
