Kryetari i Partisë Demokratike të Kosovës, Memli Krasniqi, ka fajësuar Qeverinë Kurti, që fillimi i vitit të ri shkollor filloi me zhgënjime të mëdha për prindërit e fëmijët.
Megjithatë, Krasniqi ka shkruar se të gjithë së bashku, këtë vit mund ta kthejnë në vit triumfi e arritjeje.
“Të dashur nxënës, mësues dhe prindër. Urime fillimi i këtij viti të ri shkollor për të gjithë ju! Kjo ditë e veçantë dhe emocionuese, posaçërisht për ju që po e nisni këtë rrugëtim për herë të parë, qoftë një fillim i sukseseve të njëpasnjëshme në jetën tuaj. I kuptoj shqetësimet tuaja si prindër se kjo aventurë e jashtëzakonshme për fëmijët tuaj, u shoqërua me zhgënjime të mëdha si pasojë e dështimit të Qeverisë për të siguruar librat për të gjithë nxënësit me kohë dhe në mënyrën e duhur. Por, ky dështim le të mbetet në ndërgjegjen e Qeverisë, para se të bëhet pengesë për ëndrrat e fëmijëve tanë”, ka shkruar Krasniqi në Facebook.
Madje sipas tij, është shumë e rëndësishme që përtej këtyre sfidave, mos të lëkunden synimet e askujt.
“Si nxënës, shfrytëzojeni këtë mundësi për t’u thelluar në lëndët dhe temat që ndezin pasionin tuaj. Si mësues, udhëzoni dhe frymëzoni nxënësit tuaj me njohuritë dhe përkushtimin tuaj, duke bërë më shumë për të ofruar mbështetje aty ku është më e nevojshme. Dhe si prindër, vazhdoni të jeni shtylla mbështetëse për fëmijët tuaj, duke u rrënjosur besimin se asnjë pengesë nuk është e pakapërcyeshme”, ka shkruar tutje Krasniqi./teve1.info/.
