Deputeti i Kuvendit të Kosovës nga Partia Liberale Egjiptiane, Veton Berisha, ka pretenduar se është sulmuar verbalisht, kanosur dhe ofenduar në ambientet e Qeverisë së Kosovës nga një anëtar i partisë IRDK, e cila drejtohet nga ministri në detyrë i Administrimit të Pushtetit Lokal, Elbert Krasniqi.
Lidhur me këtë akuzë ka reaguar Krasniqi i cili përmes një postimi në Facebook, ndër të tjera e ka quajtur Berishen ‘pazarxhii, njeri të ligë e pa tipare burrërie’.
Ndërkohë, të mërkurën në emisionin “Këndi i Debatit” në Tëvë1, gjuhën e Krasniqit ndaj tij Berisha e ka vlerësuar si ‘gjuhë rrugësh’ të padenjë për një ministër.
“Për çështjen në fjalë unë e kam denoncuar rastin në Polici dhe sigurisht që verdiktin do ta japin ata për të vërtetën se a kam qenë unë i kanosur, ofenduar dhe i sulmuar. Për etiketimet e tij çfarë të them unë? Ai është oponent politik dhe duhet ta arsyetoj veten përballë padrejtësive që i kanë ndodhur komunitetit, duhet ta arsyetoj për çfarë pazaresh po bëhet fjalë? Kush jam unë? Unë vetëm negocioj për të mirën e komunitetit që unë kërkoj prej secilës qeveri që me pas pozicion më të mirë dhe është shumë normale të negociojm dhe të hyjmë në një marrëveshje politike ku ne marrim përgjegjësi përballë kësaj. Sigurisht që kjo gjuhë me fjalë të rrugëve nuk mendoj se i takon një ministri. Unë po e bëj punën time. Jam i zgjedhur i komunitetit”, është shprehur Berisha.
I pyetur nëse reagimi i Krasniqit lidhet me marrëdhëniet e këqija mes tyre, Berisha ka mohuar një gjë të tillë, duke thënë se në fakt i ka bërë ftesë për bashkëpunim në mbrojtje të interesave të komunitetit egjiptian, përballë çdo qeverie./teve1.info/
