Kryetari i Partisë Demokratike të Kosovës (PDK), Memli Krasniqi, ka bërë thirrje për konstituimin e Kuvendit të Kosovës.
Ai ka kërkuar nga kryesuesi i seancës konstituive, Avni Dehari, që të mos ndikohet nga ‘manipulimet partiake’.
“E ftoj kryesuesin të mos bie nën ndikimin e manipulimeve partiake dhe ta luajë rolin e tij si i pari në mesin e barabartë, ashtu siç e përcakton Rregullorja e Kuvendit, dhe ta hedhë në votim raportin për verifikimin e mandateve. Skenari ka qenë kështu, edhe sot duhet të jetë kështu”, ka thënë Krasniqi në një prononcim për media para seancës konstituive të shtunën.
Ai po ashtu i ka ftuar të gjithë deputetët që të marrin pjesë në votim.
“Jemi këtu për ta konstituar Kuvendin dhe për t’i dhënë drejtim formimit të institucioneve të tjera. Andaj, i ftoj të gjithë deputetët që të jenë në sallë për të votuar”, ka shtuar ai.
