Ish-kryshefi i KEK-ut, Nagip Krasniqi dhe Isuf Zejna kanë mohuar fajësinë për akuzat për keqpërdorime në KEK.
Aktakuza ndaj Krasniqit, Ymer Dragushës dhe Isuf Zejnës, është ngritur më 31 dhjetor 2024, për veprat penale, “Keqpërdorim i detyrës apo autoritetit zyrtar, zbulimi i fshehtësisë zyrtare dhe ndihmë në keqpërdorim të detyrës dhe autoritet zyrtar”.
Në seancë sot fillimisht u shqyrtua marrëveshja për pranim fajësie mes Ymer Dragushës dhe prokurorisë.
Sipas prokurorisë, pranimi i fajësisë është bërë në mënyrë vullnetare dhe në përputhje të plotë me të gjitha provat materiale dhe jo materiale, me të cilat mbështetet aktakuza.
“Sipas kësaj marrëveshje, i pandehuri Ymer Dragusha, është pajtuar me llojin e dënimit të rekomanduar nga ana e prokurorisë dhe obligimet tjera që rrjedhin nga kjo marrëveshje. Me dënim unik është llogaritu dënim me burgim në kohëzgjatje prej dy vitesh, i cili nuk do të ekzekutohet në qoftë se i pandehuri përmbushë këto kushte; të plotësojë detyrimet nga marrëveshja e statusit të tij si dëshmitarë bashkëpunues, se për periudhën dy vjeçare, nuk kryen ndonjë vepër penale, si dhe i pandehuri është zotuar se do t’i kryej pagesat gjyqësore, që do të përcaktohen nga Gjykata.”- ka thënë prokurorja e rastit, Fikrije Fejzullahu.
Mbrojtja e Dragushës, i ka propozuar Gjykatës që marrëveshjen mes tyre dhe prokurorisë ta pranojë, dhe ta shqiptojë dënimin për të cilin palët kanë arritur dakordim.
Gjykata Themelore në Prishtinë, nxjerrë aktvendim për pranim të marrëveshjes për pranim të fajësisë, ndërsa vendos që të shtyhet shpallja e aktgjykimit në raport më të akuzuain Ymer Dragusha, deri në përfundim të kësaj çështje penale në tërësi.
Nagip Krasniqi dhe Ymer Dragusha akuzohen për “Keqpërdorim të detyrës zyrtare”. Ndaj Krasniqin rëndon edhe akuza për “Zbulim të fshehtësisë zyrtare”.
Kurse Isuf Zejna akuzohet për “Ndihmë në kryerjen e veprës penale, keqpërdorim i detyrës zyrtare”.
Sipas aktakuzës, ish kryeshefi i KEK-ut, Nagip Krasniqi, bashkë me Ymer Dragushën në cilësinë e ushtruesit të detyrës së drejtorit të prokurimit dhe Isuf Zejna si përfaqësues i kompanisë “Rexhep Zeqiri Zejna L.L.C”, akuzohen se buxhetit të shtetit i shkaktuan dëm rreth 37 milionë euro.
