Kryetari i Partisë Demokratike të Kosovës (PDK), Memli Krasniqi, ka kritikuar ashpër Kryeministrin në detyrë, Albin Kurti, dhe Lëvizjen Vetëvendosje (LVV), duke i akuzuar për qasje sistematike kundër Ushtrisë Çlirimtare të Kosovës (UÇK) dhe trashëgimisë së saj.
Krasniqi deklaroi se demonizimi i UÇK-së ka qenë pjesë e mënyrës së jetesës politike të Kurtit dhe atyre që i janë bashkuar atij.
“Albin Kurti e ka pasur mënyrë të jetesës demonizimin e UÇK-së dhe të udhëheqësve të saj. Gati secili që i është bashkuar atij, ka pasur ose ka përvetësuar të njëjtin mentalitet,” – shkroi Krasniqi në një postim në Facebook.
Ai përmendi disa prej emrave që ishin propozuar për postin e Kryetarit të Kuvendit nga radhët e Vetëvendosjes, duke theksuar, sipas tij, qëndrimet e tyre kundër UÇK-së:
“Albulena Haxhiu, Donika Schwartz, Hekuran Murati – të tre me qëndrime dhe veprime kundër UÇK-së dhe trashëgimisë së saj. Njëra duke ua zvogëluar fondet e mbrojtjes në Gjykatën e Hagës, tjetra duke pranuar se ka dorëzuar dosje kundër krerëve të UÇK-së, e tjetri duke përjashtuar nga paga minimale kategoritë e luftës çlirimtare dhe duke i fyer luftëtarët e lirisë në krahasimet që ua bënte me mercenarë.”
Duke iu referuar artikullit të publikuar së fundi nga Dimal Basha, Kryetari i ri i Kuvendit, Krasniqi tha se ky artikull “morbid” është dëshmi tjetër e filozofisë së Vetëvendosjes.
“Kryekuvendari i ri, me artikullin e tij morbid kundër UÇK-së, i cili doli dje në pah, vetëm sa e konfirmon filozofinë e Vetëvendosjes: sa më shumë të distancohesh nga UÇK-ja, aq më shpejt ngjitesh në parti.”
Krasniqi shpjegoi edhe pse PDK votoi për zgjedhjen e Bashës si Kryetar të Kuvendit, duke thënë se qëllimi ishte t’i jepej fund bllokadës institucionale dhe të nxirrej në pah fytyra e vërtetë e LVV-së.
“Vota jonë nuk ka qenë për individin – por për të mbajtur zotimin e dhënë para qytetarëve, me qëllim të dhënies fund bllokadës institucionale. Por, edhe për ta zhveshur Vetëvendosjen dhe për ta vënë para reflektorit publik të së vërtetës.”
Ai shtoi:
“Gjatë janë fshehur e amnistuar prapa Glaukave, por në fakt këta janë Dimala. Nëse ndokush ka pasur dyshime, qoftë edhe brenda elektoratit të tyre, sot besoj e kanë të qartë këtë.”
Krasniqi përfundoi duke riafirmuar qëndrimin e PDK-së si trashëgimtare e UÇK-së dhe angazhimin për ta mbrojtur luftën dhe vlerat e saj.
“Sa për PDK-në, partinë që e pasoi UÇK-në, pavarësisht gjithçkaje e çdo zhurme, do ta mbrojë me çdo kusht, si çdo herë tjetër, luftën e UÇK-së dhe shtetin e Kosovës.”
