Kryetari i Partisë Demokratike të Kosovës, Memli Krasniqi ka bërë homazhe te shtatorja e Zahir Pajazitit, në 27 vjetorin e rënies, shkruan teve1.info.
Krasniqi theksoi se Zahir Pajaziti, Hakif Zejnullahu dhe Edmond Hoxha dhanë edhe jetën më 31 janar të vitit 1997, duke u shndërruar siç tha ai, në shembull dhe frymëzim për gjeneratën e artë të burrave dhe grave të Ushtrisë Çlirimtare të Kosovës.
“Nuk ka asgjë më të shtrenjtë sesa liria. Duke e ditur këtë, Zahir Pajaziti, Hakif Zejnullahu dhe Edmond Hoxha u organizuan kundër pushtuesit dhe robërisë, sepse, ata, lirinë që kishin në zemrat dhe mendjet e tyre, e donin për të gjithë Kosovën. Për këtë ideal, ndër pushkët e para të lirisë, dhanë edhe jetën më 31 janar të vitit 1997, duke u shndërruar në shembull dhe frymëzim për gjeneratën e artë të burrave dhe grave të Ushtrisë Çlirimtare të Kosovës. Lavdi e përjetshme për heronjtë e Kosovës”, tha Krasniqi./teve1.info./
