Kryetari i Partisë Demokratike të Kosovës (PDK), Memli Krasniqi, ka deklaruar se Albin Kurti nuk do të jetë më kryeministër i Kosovës, pas dështimit për të siguruar shumicën e votave në Kuvend gjatë seancës së së dielës.
Sipas Krasniqit, kjo situatë tregon qartë se Kurti dhe Lëvizja Vetëvendosje janë përgjegjës për krizën politike në vend.
“Kemi pasur nëntë muaj bllokadë dhe sot u vërtetua ajo që kemi thënë që nga hera e parë. Albin Kurti nuk i ka numrat. 56 vota për dhe asnjë më shumë. Albin Kurti më nuk do të jetë kryeministër as prej 9 shkurtit e as prej zgjedhjeve të ardhshme. Koha e qeverisjes së tij ka marrë fund,” ka deklaruar Krasniqi.
Ai gjithashtu ka theksuar se PDK nuk do të tentojë të formojë një shumicë të re nga partitë ish-opozitare, duke bërë të qartë se vendi po shkon drejt zgjedhjeve të jashtëzakonshme.
“Që nga 10 shkurt kam bërë përpjekje për t’i dhënë vendit një qeveri nga partitë e ish-opozitës, por nuk ka pasur sukses. Sot është e qartë se Albin Kurti nuk ka shumicë parlamentare, por as partitë e tjera, përfshirë PDK-në, nuk kanë shumicën e nevojshme. Prandaj, duhet të shkojmë sa më shpejt drejt zgjedhjeve të jashtëzakonshme,” shtoi ai.
