Kryetari i Partisë Demokratike të Kosovës, Memli Krasniqi, ka ftuar qytetarët që të dalin dhe të votojnë në rundin e dytë të zgjedhjeve lokale.
Krasniqi theksoi rëndësinë e pjesëmarrjes qytetare dhe shprehu bindjen se procesi do të zhvillohet me rregull, siç ka ndodhur në rundin e parë.
“Sot në të gjitha komunat ku ka balotazh për kryetar të komunave, unë i ftoj qytetarët që të dalin dhe të marrin pjesë pavarësisht zgjedhjes së parë që kanë bërë. Secili prej tyre mund ta luajë një rol të rëndësishëm për t’i dhënë drejtim komunave ku jetojnë në katër vitet e ardhshme. Me shpresën që do të kemi një dalje masive dhe substanciale që vërtetë do të reflektojë vullnetin e qytetarëve. Uroj që edhe ky proces të shkojë me rregull sikurse rundi i parë. Ditë e mirë për Kosovën, për komunat dhe besoj që përfundimisht do të kemi një përmbyllje të një procesi që i jep drejtim katër viteve të ardhshme”, ka deklaruar Krasniqi pas votimit.
