Kryetari i Partisë Demokratike të Kosovës, Memli Krasniqi ka reaguar pas publikimit të sotëm të rezultateve të testit PISA, ku Kosova renditet në vendet e fundit pothuajse në të gjitha fushat.
Për këtë Krasniqi tha se sot u konfirmua rënia e thellë e rezultateve të nxënësve të Kosovës në testin e PISA-s në lexim, matematikë dhe shkencë.
Derisa i pari i PDK-së, theksoi se me këto rezultate u dëshmua edhe njëherë se, qëllimi i Qeverisë nuk ka qenë asnjëherë reforma arsimore dhe se sipas tij, analfabetizmi qeveritar tashmë po shkatërron edhe shkollat në vend.
“Në secilën fushë ka rënie drastike të pikëve, krahasuar me vitin 2014 dhe vitin 2018, kur është mbajtur për herë të fundit testi PISA. Ne e kemi ditur, por tashmë edhe po dëshmohet, se qëllimi i kësaj Qeverie nuk ka qenë asnjëherë reforma arsimore e as përmirësimi i jetesës së qytetarëve tanë. Analfabetizimi qeveritar, fatkeqësisht, tashmë po shkatërron edhe shkollat tona!”, ka shkruar Krasniqi.
Ndryshe, ministrja e Arsimit, Arbërie Nagavci, në konferencë për media sot, ka thënë se këto kanë qenë rezultate të pritshme duke pasur parasysh problemet me mësimin gjatë pandemisë./teve1.info./
