Kryetari i Partisë Demokratike të Kosovës, Memli Krasniqi e ka vlerësuar si të panevojshme shtyrjen e zgjedhjeve parlamentare, pasi presidentja Osmani ka caktuar 9 shkurtin e vitit 2025 datë kur qytetarët do të zgjedhin Qeverinë e Kuvendin e ri.
Por, Krasniqi ka thënë se është më e rëndësishme që tash ka një datë për zgjedhje e cila sipas tij do të shënojë ikjen e kësaj qeverie dhe ardhjen e një tjetre.
“Për ne kjo shtyrje është e panevojshme, por tashmë kjo ka pak rëndësi. Mbi të gjitha, e rëndësishme është se tani kemi një datë, e cila do të shënojë ikjen e një qeverie të papërgjegjshme dhe ardhjen e një tjetre, kredibile e të aftë, në krye me Bedri Hamzën. Siç na e dëshmon edhe historia, me PDK-në dhe Bedriun në timon, Kosova do të rikthehet në rrugën e munguar të zhvillimit, integrimit, partneritetit e miqësisë së mirëfilltë. Është koha që të bëhemi bashkë edhe një herë për Kosovën që e ëndërrojmë të gjithë”, ka shkruar Krasniqi.
