Kryetari i Partisë Demokratike të Kosovës, Memli Krasniqi, ka uruar qytetarët për nder të Ditës së Çlirimit të Prishtinës.
Krasniqi, tha se 10, 11 dhe 12 qershori, Kosovën e ndërlidhin historikisht si asnjë datë tjetër.
“Betimi i burrave të kombit, me 10 qershor 1878, në Prizren, shndërrohet në amanet që do të përcillet brez pas brezi, për t’u përmbushur saktësisht 121 vite më vonë – në Prishtinë! Me 10 qershor 1999 Serbia gjunjëzohet! Me 11 qershor 1999 Prishtina çlirohet! Me 12 qershor 1999 liria vjen në Kosovë”, ka shkruar deputeti në Facebook.
Tutje, ai tha se sot nderohen të gjithë luftëtarët, veprimtarët, intelektualët, dhe martirët ndër breza të cilët tha se u bënë urë e dritë për këtë ditë.
“Sot, përulemi para vetëmohimit të pjesëtarëve të Ushtrisë Çlirimtare të Kosovës, posaçërisht dëshmorëve, të cilët besuan në idealin e luftës së tyre, edhe atëherë kur pak kush kishte më shpresa. Sot, është obligimi ynë, si shtet e popull, që duke kujtuar e nderuar të kaluarën, të ndërtojmë një vend të zhvilluar – ku secili mund të projektoj një të ardhme të dinjitetshme e prosperuese. E përjetshme qoftë Kosova!”, ka shkruar tutje./teve1.info/
