Deputeti i LVV-së, Nezir Kraki pret që Gjykata Kushtetuese ta interpretojë Kushtetutën dhe të jetë garantuese e rendit Kushtetues.
Kraki në emisionin “Mesditë” në Tëvë1 shpreson që Gjykata Kushtetuese të mundësojë zhbllokimin për konstituimin e Kuvendit ose vendi të shkon në zgjedhje të reja.
Sipas Krakit, vendimi i fundit i Gjykatës Kushtetuese i cili ka pezulluar të gjitha veprimet dhe vendimet e deputetëve të Kuvendit të Kosovës, duke përfshirë edhe procedurat për formimin e qeverisë, siç tha ai ka qenë skandaloze.
Tutje, ai shtoi se Gjykata Kushtetuese nuk ka të drejtë në asnjë vend demokratik të shtojë nene.
“Ne presim që Gjykata Kushtetuese ta interpretojë Kushtetutën dhe të jetë garantuese e rendit Kushtetues dhe të mundësojë një here e mirë zhbllokimin ose të shkojmë në zgjedhje të reja ose të zhbllokohet situate. Ne kemi dëshmuar deri sot se kemi respektuar vendimet edhe atë të fundit që ka qenë sipas meje absolutisht skandaloze, nuk është kjo me iu ndërhy Gjykatës, kur unë e them me profesionalizëm se Gjykata Kushtetuese nuk ka të drejtë jo në Kosovë por në asnjë vend normal demokratik, nuk ka të drejtë me ardhur me shtua nene apo pikë, vetëm të zgjedhurit e popullit kanë të drejtë me shtua nene ose fjalë. Gjykata Kushtetuese nuk është aty me interpretua rregulloren e Kuvendit, por vetëm Kushtetutën”, ka deklaruar Kraki.
Ndryshe, sot përfundon masa e përkohshme e vendosur nga Gjykata Kushtetuese e Kosovës, e cila që nga 5 shtatori i ka pezulluar të gjitha veprimet dhe vendimet e deputetëve të Kuvendit të Kosovës, duke përfshirë edhe procedurat për formimin e Qeverisë./teve1.info/
